A Deputación de Lugo apelou á unidade para “traballar” na recuperación socioeconómica e laboral, nun comunicado que fixo público coincidindo coa celebración do Primeiro de Maio.
“Xuntos estamos a loitar contra unha situación sanitaria inédita e xuntos debemos traballar pola recuperación socioeconómica e laboral da nosa provincia e do conxunto do país”, afirma.
Respecto diso, sostén que “só unindo esforzos conseguiremos que a paulatina volta á normalidade non deixe a ninguén atrás e que o tempo da recuperación da actividade económica sexa o menor posible”.
“Temos que aproveitar, ademais, a situación xerada para aprender da experiencia e mellorar as características do noso Estado do Benestar, do noso mercado laboral e do noso tecido produtivo”, afirma ao reivindicar un modelo “sólido” con servizos públicos de “calidade”, así como un sistema de protección social “que non deixe á cidadanía á súa sorte”.
Por outra banda, traslada un recoñecemento “a todas as persoas traballadoras que faleceron a consecuencia da pandemia do coronavirus“. “Do mesmo xeito, merecen unha mención especial todos aqueles traballadores e traballadoras aos que a crise de laCOVID-19 obrigou a facer un esforzo especial”, indica en alusión a persoal sociosanitario, de limpeza, agroalimentario ou do transporte, entre outros.
