Hai uns meses, coñecíase a situación inestable do persoal do centro de día municipal Antonio Gandoy, cuxa empresa concesionaria non pagaba as nóminas a tempo. Ao ver que as circunstancias non cambiaban, hai unhas semanas comezaban en Lugo mobilizacións cidadás para instar ao goberno local a solucionar a problemática. Agora é o PP quen se ergue contra esta situación: Denuncia a ausencia de control municipal na concesión deste centro de día.

A concelleira do grupo municipal do PP en Lugo, Carmen López Silva, quéixase de que os empregados destas instalacións están a sufrir continuos retrasos no cobro dos seus salarios. Achaca isto á suposta falta de control e de pago da concesión por parte do goberno local, unha realidade que din coñecer ben no PP logo de visitar o propio centro de día.

López Silva critica que “a falta de traballo” do goberno bipartito local vese reflectida neste tipo de problemáticas “tan desagradables”. Non só é que o persoal tarde meses en cobrar, senón que dende o PP aseguran que tampouco se lles aplicou a suba salarial recollida no acordo da concesión e que tampouco reciben os uniformes regulamentarios. Nalgúns casos, os traballadores chegaron a comprar eles mesmos a roupa de traballo, sinalan os populares.

“Son situacións que nos levan a pensar nunha falta total de control por parte do goberno local”, sostén Carmen López Silva. Cre que estas circunstancias son consecuencia da tónica xeral que ven no Concello, en alusión á presunta falta de supervisión das concesións municipais. Por iso, o PP pedirá por escrito todos os documentos, actas ou informes que demostren “algún tipo de control” sobre esta concesión en concreto.