Despois de conseguir a vitoria no proceso para elixir ao novo secretario xeral do PSdeG de Lugo cun 67 % dos votos, a deputada autonómica Patricia Otero dixo que a súa intención é incluír na executiva provincial socialista, que sairá do congreso que se celebrará este próximo sábado, a todas “as sensibilidades” do partido nesta provincia, co obxectivo de “remar todos na mesma dirección”.

Nese sentido, dixo que todos aqueles militantes que apoiaron a candidatura do alcalde de Castroverde, José María Arias, poden estar “tranquilos”, porque no seu proxecto para o PSdeG de Lugo “caben todos” e “a militancia será unha peza fundamental” do mesmo.

En canto á posibilidade de integrar ao propio Arias na súa executiva, Otero lembrou que ela mesma lle ofreceu durante o proceso de primarias que se fixese cargo da secretaría de Medio Rural na súa executiva ou mesmo que ocupase a vicesecretaría xeral do PSdeG de Lugo, pero “declinou ese ofrecemento”.

En todo caso, á espera de ver que sucede no congreso do sábado, a deputada autonómica asegurou que a súa intención é “integrar a todas as sensibilidades” do partido no seu proxecto e, por tanto, darlles participación na executiva.

Otero mostrouse “moi satisfeita polo gran respaldo da militancia” neste proceso e asegurou que ela pretende ser “a secretaria xeral de todos”, porque a súa idea é facer un partido “máis forte, máis unido e máis cohesionado”, co obxectivo último de facer do PSdeG a primeira forza política de Lugo para que Gonzalo Caballero chegue á Presidencia da Xunta de Galicia.

“Temos un obxectivo claro. Polo que agora, neste momento de estabilidade, temos que remar todos no mesmo sentido”, engadiu. En canto ao proceso de primarias, quixo felicitar ao partido por este “gran acto de democracia interna”.