Veciños de Parga, en Guitiriz, demandaron a reapertura do centro de saúde que dá cobertura a unhas 1.700 persoas e que permanece pechado desde hai un ano.
Así o expresou o portavoz da asociación veciñal ‘Parga Non Se Divide’, Alfonso Losada, que advirte que a maioría dos veciños afectados son poboación de idade avanzada que teñen que desprazarse ata Guitiriz, onde foron trasladados os dous médicos, a ATS e o celador que traballaban en Parga.
Por iso, reivindica que “se vaian dando pasos” cara a un “desconfinamento” deste centro que as autoridades sanitarias pecharon pola pandemia hai un ano. Solicitan que a reapertura arrinque coa presenza do persoal de enfermaría “traballando todo o día, e a partir de maio” se incorpore un dos médicos.
Alfonso Losada explicou que pretenden a reapertura en maio atendendo a que “a maior parte da xente de oitenta anos xa estará vacinada”. Así poderíase atender “especificamente a esa poboación” inmunizada e ao resto seguila “atendendo en Guitiriz”.
O activista veciñal precisou que agora “só acode un ATS” a Parga, que tamén conta cun celador que os martes e xoves fai extraccións de sangue pero “ningún outro tipo de labor, nin curas, nin ningún tratamento”. “Hai persoas que fan extraccións ás oito e media da mañá en Parga e logo teñen que desprazarse a Guitiriz ás dez e media para que lles fagan as curas”, lamentou finalmente o portavoz de ‘Parga Non Se Divide’, Alfonso Losada.
