A vila de Parga acolleu na mañá deste martes a primeira das mobilizacións da semana para reclamar a completa reapertura do consultorio médico, pechado parcialmente durante o estado de alarma sen que o Sergas valore agora o restablecemento da totalidade dos servizos. Segundo a plataforma Parga Non Se Divide, a protesta xuntou unhas 200 persoas.
Con máscaras de protección e cunha pancarta que rezaba “Ambulatorio de Parga, reapertura total xa”, os manifestantes citáronse diante do centro médico. Piden a recuperación de todos os servizos prestados anteriormente e cuxa supresión implica o desprazamento de centos de usuarios ata o PAC de Guitiriz, un centro acusado pola saturación, segundo aseguran.
OFICINA DE ABANCA “AO 100%”
Tras un aplauso “a modo de arroupamento” á ATS (auxiliar técnico sanitaria) e o PSX (persoal de servizos xerais), os veciños movéronse ata a oficina de Abanca, outro punto de mira na loita de Parga. O peche parcial desta sucursal —que só atende ao público dous días á semana— deixa na localidade o temor a que se convirta nunha clausura total.
A plataforma Parga Non Se Divide entende que esta paulatina redución de servizos pon en perigo o futuro da vila, tamén ameazado polo proxecto de Adif para a suspensión dos pasos a nivel. Din estar dispostos a seguir adiante coas protestas e as reivindicacións para defender non só o consultorio e a oficina, senón a vida e a economía local que van da súa man.
VINDEIRAS PROTESTAS
Ao remate da manifestación, convidouse a todos os veciños e veciñas a acudir o xoves 25 á concentración prevista ás 10:00 horas na entrada do Hospital Universitario Lucus Augusti (HULA), en Lugo. Disporanse autobuses de balde para trasladar os manifestantes.
