CCOO, CSIF e Sindicato Libre, organizacións sindicais que representan ao 85 por cento do persoal de Correos, coordinan mañá paros en toda España. Os empregados paralizarán o servizo nas dúas últimas horas do turno de noite, de mañá e de tarde. Protestarán así polos recortes previstos en 2018 e os efectuados estes anos, que suprimiron un de cada catro postos de traballo a nivel español e tamén na provincia de Lugo.

Precisamente será a cidade de Lugo a que liderará o protesto cunha manifestación pola supresión de 120 empregos e a precarización do servizo de Correos. A marcha partirá da rúa Juan Montes ás 13.30 horas, e percorrerá as rúas Progreso e San Pedro, Praza Maior, Conde Pallares, Dr. Castro, Armanyá e Praza de Armanyá, diante da Subdelegación do Goberno, onde finalizará ás 14.30 horas.

Os paros están xustificados pola reducción orzamentaria de 123 millóns en 2017, aos que hai que engadir outros 60 para 2018. Segundo salientan os sindicatos, estas reduccións deixan a Correos sen plan de modernización para o mercado da paquetería e o comercio electrónico, e advirten de que non compensarán o déficit de 225 millóns previsto para este exercicio. As mobilizacións continuarán despois de xuño e ata finais de ano.

En conxunto, na última década foron eliminados 15.000 empregos fixos, o 26 por cento do total, un punto porcentual por enriba da provincia de Lugo. Entre os efectos desta reducción están a perda de calidad no servizo, con saturación polas baixas por enfermidade e unha caída nas condicións laborais. De manter o actual recorte, en Lugo caerían 230 postos pola falla de reposición de efectivos. Os sindicatos advirten que na capital lucense será imposible facer o reparto cinco días á semana e alertan do impacto no extrarradio e nas zonas rurais, incluído o recorte do horario de atención ao público.