A secretaria xeral do PP galego, Paula Prado, acusou ao BNG “e os seus satélites” de “boicotear” a planta de Altri en Palas de Rei e de “rebentar” os encontros que a empresa quería celebrar cos veciños da zona a través de “faltas de respecto” e “violencia”. Nunha rolda de prensa celebrada este venres na sede do PP de Galicia en Santiago, Prado incidiu en que “a radicalidade” do BNG reflíctese “neste tipo de cousas”. “Non pode ser que vaian rebentar reunións con faltas de respecto e violencia”, aseverou en relación ao paso atrás dado pola multinacional portuguesa na súa intención de celebrar encontros con veciños da comarca da Ulloa afectados o proxecto da fábrica.
A número dous dos populares galegos cargou contra os nacionalistas polo seu “cambio de opinión” sobre a implantación desta factoría dous anos despois de votar a favor dunha iniciativa no Parlamento de Galicia presentada polo PP e que contou tamén co apoio do grupo socialista. Prado pediu ao PSdeG e, en concreto, ao seu aspirante á Secretaría Xeral, José Ramón Gómez Besteiro, que aclare cal é a súa postura sobre este proxecto empresarial sobre o que xa manifestou a súa oposición o Bloque, ao que o PP afea que trate de “boicotear o futuro de Galicia”.
Para Prado, o “cambio” na postura do BNG sobre Altri é similar ao que tivo a súa líder, Ana Pontón, cando visitou Inditex “despois de chamar explotador a Amancio Ortega” ou de pór como “referente” a Finsa cando “hai anos criticábaa por ser parte da oligarquía da madeira”. “O PSOE e o BNG deberán explicar por que pasaron de apoiar a Altri a querer boicotear o seu instalacion. No PP dixemos, dicimos e seguiremos dicindo si a esta e a todas as iniciativas que fagan que Galicia prospere”, aseverou.
“NON COÑEZO EN PROFUNDIDADE O PROXECTO”
A preguntas dos xornalistas sobre as denuncias dos colectivos que se opoñen á factoría e que denuncian que a fábrica de fibras téxtiles esconde a actividade dunha pasteira para producir celulosa a partir de eucalipto, Prado admitiu que non coñece “en profundidade o proxecto”. “Como calquera proxecto estratéxico innovador novo é normal que xere inquedanzas entre os veciños. Sobre todo se hai grupos políticos intersados en intoxicar con todos os seus satétites, que todos coñecemos”, espetou Prado, que defendeu que “non hai ningunha dúbida de que se van a cumprir todos e cada un dos parámetros ambientais”, polos que velará a Xunta de forma “escrupulosa”.
BESTEIRO: “HAI COUSAS QUE SON DISTINTAS DO QUE SE DIXO NUN PRINCIPIO”
Como se escoitase a Prado, o portavoz parlamentario do PSdeG e candidato á Secretaría Xeral da formación, José Ramón Gómez Besteiro, avisou dos cambios no proxecto que Altri expón en Palas de Rei e defendeu o “respecto escrupuloso” do medio ambiente. Preguntado sobre esta iniciativa industrial e as protestas de veciños rexistradas na última semana, o político lucense subliñou o apoio dos socialistas aos proxectos industriais pero cun “respecto escrupuloso” dos requisitos ambientais autonómicos, estatais e europeos como beneficiaria de fondos comunitarios.
O socialista advertiu dos cambios coñecidos no proxecto da multinacional portuguesa. “Hai cousas que parece que son distintas do que se dixo nun principio”, sostivo Beteiro para sinalar que “ía ser unha fábrica téxtil ecolóxica” e que “agora parece que ten unha parte importante de celulosa”. Besteiro apuntou que tamén pasou de prometer 1.500 empregos a proxectar 500. “O que nos ocupa e preocúpanos” é o cumprimento dos requisitos ambientais por parte das iniciativas empresariais.
Ademais, considerou necesario coñecer a viabilidade da planta. Así, reclamou á Xunta que explique “canto está disposta a achegar” ao declarar este proxecto como estratéxico, e a aclarar “se a viabilidade vai pasar polo financiamento e subvencións públicas ou vai ter viabilidade propia”.
O PSOE DE LUGO ACUSA A RUEDA DE USAR AS EXPROPIACIÓNS COMO AMEAZA
A portavoz socialista da Deputación Provincial de Lugo, Pilar García Porto, acusou este venres ao presidente da Xunta en funcións, Alfonso Rueda, de “utilizar publicamente” a hipotética expropiación de terreos para a implantación da fábrica de fibras téxtiles e celulosa como “unha ameaza nesgada aos veciños” se non están dispostos a vender.
Así o manifestou a portavoz da institución provincial ao termo da reunión ordinaria da Xunta de Goberno e tan só un día despois de que Rueda non descartase o procedemento da expropiación no caso de que a compañía non alcanzase “acordos voluntarios” cos posibles vendedores.
“Hai un tremendo escurantismo por parte do Partido Popular. Habería que preguntarse por que tanto interese cando o presidente da Xunta é capaz de saír con ameazas nesgadas coa expropiación dos terreos. A expropiación é unha ferramenta legal, pero non comparto que se utilice publicamente como unha ameaza”, declarou respecto diso Pilar García Porto.
