O Concello de Lugo remitiu hai algúns días á Consellería de Medio Ambiente a resposta de validación en positivo do estudo de detalle da Casa Torre ou Hospital de San Miguel, para que así a Xunta continúe coa súa recuperación.
Fixérono unha vez que os servizos técnicos municipais comprobaron que a Xunta incluíra as últimas modificacións solicitadas desde o municipio, “cambios que os servizos municipais requiriron co fin de respectar o carácter singular da edificación”. A edil de sostenibilidade urbana, Paula Alvarellos, lembrou que a Xunta solicitou a licenza para recuperar casa Torre sen presentar o estudo de detalle, necesario para poder conceder este permiso de obra.
“É a agregación das unidades edificatorias que integran o inmoble o que debía recoller este estudo, os números 32 e 34 da rúa Rinconada do Miño”, explica. Neste sentido, sinala tamén que “o Concello debe velar porque se rehabiliten estas edificacións segundo a normativa de protección do patrimonio e respectando a súa estrutura, e máxime cando se trata do único conxunto medieval desta tipoloxía que se coñece na cidade”.
O municipio envioulle á Xunta a resposta aos últimos cambios introducidos nun prazo menor de quince días, recalcan, “porque tentan acelerar e axilizar o proceso, mantendo sempre o contacto coa Consellería pola importancia que ten para a cidade que o Goberno galego recupere este espazo da súa propiedade tras anos de abandono”.
