Unha fotografía dos Ancares Lucenses aparece incluída nun calendario do 2021 editado pola Rede Española de Reservas da Biosfera en colaboración coa prestixiosa National Geographic. A imaxe, que ilustra o mes de marzo, titúlase ‘Ocaso castrexo’ e foi tomada no castro de Santa María de Cervantes por Óscar Doral, un dos gañadores do IV Concurso de Fotografía das Reservas Terras do Miño e Os Ancares Lucenses
Trátase da única representación das Reservas galegas que figura no calendario editado por National Geographic e foi escollida entre os 52 territorios de toda España que contan con este recoñecemento da UNESCO.
O presidente da Deputación, José Tomé, destaca que a iniciativa “contribuirá á proxección da riqueza medioambiental da nosa provincia a nivel nacional e internacional, algo especialmente importante nestes momentos de crise provocada pola pandemia”.
A publicación conmemora o 50º aniversario do programa Persoa e Biosfera (MaB), que se celebra este ano.
