O castro de Santa María, no concello de Cervantes, loce bonito tras rematar os traballos de consolidación e limpeza levados a cabo nas súas inmediacións durante o mes de outubro. O asentamento vén de ser recoñecido como Ben de Interese Cultural a nivel Nacional.

O colectivo Patrimonio dos Ancares, promotor da posta en valor deste xacemento arqueolóxico da man da ANPA do CEIP de Cervantes, confesa a súa “satisfacción” non só por acadar a máxima protección legal, senón pola “celeridade” da Consellería de Cultura á hora de realizar as devanditas actuacións de rehabilitación.

En concreto, e segundo explican dende a asociación, consolidáronse todas as estruturas habitacionais, os fogares e unhas tumbas baixomedievais; reconstruíuse un muro que se viñera abaixo e que pecha o adro-cemiterio onde se levanta a igrexa; e, ademais, acometeuse a limpeza de todo o xacemento.

Xabier Moure, presidente do colectivo, lembra que entre os máis de 1.200 castros da provincia de Lugo, “só tres teñen a consideración de BIC: Fazouro, Viladonga e Santa María do Castro”. “Estamos seguros de que con este novo impulso se vai converter nunha referencia obrigada“, engade.

Así mesmo, xa adianta que nas vindeiras semanas a Deputación colocará uns novos sinais de dirección cara ao castro.