A Audiencia Provincial de Lugo acollerá o vindeiro venres o xuízo contra un home para o que Fiscalía pide 10 anos de prisión por asfixiar ata a morte ao seu irmán en Rábade.
Segundo o escrito do Ministerio Público, os feitos ocorreron o 23 de novembro de 2019, cando o acusado apertou o pescozo da vítima ata causar o seu falecemento. Acto seguido, chamou á Garda Civil para comunicar os feitos. Atópase en prisión provisional desde o 25 de novembro dese mesmo ano.
O falecido, un home que contaba con 45 anos de idade, padecía unha minusvalía do 65 por cento e estaba incapacitado xudicialmente. Segundo a Fiscalía, o acusado “tiña as súas facultades para comprender os seus actos e a vontade para decidirse a executalos intactas” no momento dos feitos.
Por todo iso, o home enfróntase a unha pena de cárcere de 10 anos de prisión por un delito de homicidio con agravante de parentesco. Ademais, deberá indemnizar con 21.000 euros a outro dos seus irmáns en concepto de responsabilidade civil.
