O alcalde do municipio lucense de Portomarín, o popular Juan Serrano, vinculou a desfeita do asfalto dunha estrada provincial ao “cabreo” dun veciño.

En concreto, uns cen metros de asfalto da estrada LU-P-4902, ao seu paso por Portomarín, apareceu totalmente levantado, polo que a Deputación de Lugo, titular do viario, presentou denuncia ante a Garda Civil.

Respecto diso, o alcalde, que sostivo que “hai tempo” que a vía “está esnaquizada“, lembra que a Deputación habilitou unha sinalización de “tramo de estrada moi perigosos fai seis ou oito meses”. “O que non podes facer é sinalizar unha estrada como moi perigosa e non arranxala“, afeou.

Serrano puntualizou que dita vía “serve a unha parte importante do municipio”. “E supoño iso que xa estaba deteriorado deteriorouse un pouco máis”, apuntou. Dito isto, considerou os estragos “posiblemente” se poden deber “ao cabreo dunha persoa”. “Ou tamén puido ser algo fortuíto que a un tractor lle caese o arado porque lle fallaron os hidráulicos”, manifestou para asegurar que “non” sabe exactamente “o que pasou”. “Estaba mal e púxose peor”, sinalou.

A desfeita da estrada de Alto do Valiño por Vilaxuste a Valdeporrás, que enlaza coa Nacional 540 cara a Ourense, foi examinado por técnicos da Deputación de Lugo que calculan que os danos ascenden a uns 90.000 euros.