A Televisión de Galicia emitirá este luns 13 de xaneiro (22:35 horas) un programa especial no que pasarán ’24 horas con Benedicta’. Esta actriz de 84 anos, veciña do Corgo, lembrará os seus anos de emigración no Brasil, explicará como lle cambiou a vida tras o éxito de O que arde (Oliver Laxe, 2019) e amosará como é a súa rutina diaria na súa casa en San Cosme de Manán.
A presentadora Olaya Rivas viaxará ata O Corgo para coñecer a Benedicta Sánchez máis alá das cámaras de cine ou das alfombras vermellas. Ela, que sempre presume de levar unha vida rural e conectada coa natureza, ha de achegarnos ás súas orixes e á súa contorna: dende a horta da súa casa ata as aldeas onde naceron seu pai e súa nai.
Así mesmo, o programa da TVG levaraa a carón do río Chamoso, lugar onde os seus achegados lle teñen preparada unha sorpresa. A actriz, nomeada aos Premios Goya na categoría de Actriz Revelación, escoitará o que pensan dela os seus coñecidos tras vela actuar na gran pantalla.
Por último, Benedicta Sánchez tamén se desprazará ata a cidade de Lugo, onde residen a súa filla e netos. Alí, uns e outros contarán como se fraguou a decisión de presentarse ao cásting de O que arde, pero tamén haberá tempo para mergullarse nas vellas fotografías que lembran o pasado de Benedicta en Río de Xaneiro, onde se gañou a vida disparando instantáneas.
“Eu estou entre dous mundos!”, confesaba ela mesma ao Lugo Xornal nunha entrevista o pasado verán. Esta noite, as galegas e galegos terán a oportunidade de coñecer esoutro mundo de Benedicta Sánchez.
Benedicta Sánchez: a vida de película desta muller do Corgo antes de ser unha estrela en Cannes
