As pistas de squash do Pazo dos Deportes funcionan de novo a pleno rendemento tras rematar os traballos de renovación contratados pola Vicepresidencia da Deputación de Lugo.
A intervención centrouse na renovación dos paneis de madeira da parede dianteira, con polímero de alta resisencia e hidrófugo, e na reparación dos muros laterais con revestimento de morteiro.
O vicepresidente da Deputación de Lugo Efrén Castro explicou que “se trata dun investimento máis na modernización e actualización do Pazo, unha instalación que, ademais de ser a casa do baloncesto, empregan deportistas doutras modalidades, ofrecendo un servizo fundamental para a actividade deportiva na cidade de Lugo”
A Vicepresidencia da Deputación destinou 36.000 euros á renovación destes espazos deportivos, que empregan habitualmente deportistas dos clubs lucense Squash Muralla e Monstruíños, ademais doutros deportistas a título particular.
