O Concello de Lugo, a través do Centro de Convivencia de Fingoi, da área de Política Social, Maiores e Migración, organiza a participación lucense nas I Olimpíadas de Envellecemento Saudable, que se celebrarán o vindeiro sábado 19 de setembro en Chantada.
A actividade está aberta a persoas de todas as idades e combina deporte, exercicio cognitivo e convivencia. As persoas participantes deberán contar cunhas condicións físicas mínimas que lles permitan realizar a ruta de sendeirismo de aproximadamente sete quilómetros prevista dentro do programa.
A xornada comezará coa saída desde Lugo ás 8:30 horas, desde a Praza de Bretaña, con destino a Chantada. Durante a mañá desenvolveranse diferentes probas deportivas de resistencia, forza e velocidade, que se combinarán con actividades cognitivas como xadrez e dominó.
O programa incluirá tamén a entrega de premios, música e un xantar popular. Pola tarde realizarase unha ruta de sendeirismo de sete quilómetros pola Ribeira Sacra e, de maneira opcional, unha visita a unha adega. A xornada rematará con música e coa elaboración dun mural colectivo, estando prevista a chegada de regreso a Lugo arredor das 20:30 horas.
Inscricións do 25 ao 28 de agosto
As persoas interesadas en participar nas Olimpíadas e representar ao Concello de Lugo deberán realizar a súa inscrición presencialmente no Centro de Convivencia de Fingoi entre o martes 25 e o venres 28 de agosto. O prezo da actividade é de 12 euros por persoa e inclúe o programa previsto para toda a xornada.
Desde o Concello de Lugo anímase á cidadanía a participar nesta primeira edición das Olimpíadas, unha iniciativa que busca fomentar un envellecemento activo e saudable desde unha perspectiva interxeracional, promovendo a actividade física, o exercicio cognitivo e as relacións sociais en todas as etapas da vida.
