O Concello de Lugo recupera o quiosco da Praza Maior como espazo de servizo público

O Concello de Lugo recuperou para a cidadanía o quiosco da Praza Maior, que abriu esta semana convertido nun novo espazo de servizo público. As instalacións contarán cun servizo de aseos públicos e cun punto fixo de información turística, cumprindo así o compromiso adquirido polo Goberno municipal de devolver este espazo á cidade cun uso útil para os lucenses e para as persoas que visitan Lugo.

A alcaldesa, Elena Candia, o concelleiro de Turismo e Museos, Agustín Gallego, e o de mobilidade e obras, Antonio Ameijide, visitaron esta mañá as instalacións para comprobar o seu funcionamento. O quiosco permanecerá aberto todos os días, de 10.00 a 15.00 horas e de 16.00 a 20.00 horas. Durante ese horario estarán dispoñibles tanto o servizo de información turística como os novos baños públicos.

A alcaldesa lembrou que esta actuación responde a un compromiso adquirido polo Goberno municipal poucas semanas despois de asumir a responsabilidade de goberno. Candia destacou que esta é unha desas actuacións que melloran de forma directa o día a día da cidade.

- Advertisement -

“Ás veces gobernar tamén consiste en resolver cuestións sinxelas, pero moi necesarias. A Praza Maior levaba moito tempo sen un servizo tan básico como uns baños públicos. Hoxe esa carencia queda resolta recuperando un espazo que permanecía pechado para convertelo nun servizo útil para toda a cidadanía.”

CERTAME PINTURA RÁPIDA

O Concello de Lugo celebrará este domingo, 12 de xullo, unha nova edición do Certame de Pintura Rápida ao Aire Libre “Cidade de Lugo”, unha cita xa consolidada dentro da programación cultural municipal que volverá converter durante unha xornada as rúas, prazas e espazos máis emblemáticos da cidade nun gran estudio artístico ao aire libre.

O certame reunirá pintores e pintoras procedentes de diferentes puntos de Galicia e do resto de España, que realizarán as súas obras diante do motivo escollido, ofrecendo unha interpretación persoal de Lugo a través da súa mirada artística. A iniciativa permitirá tamén que a veciñanza e as persoas que visiten a cidade poidan seguir en directo o proceso creativo dos participantes.

As inscricións serán gratuítas e realizaranse o propio domingo 12 de xullo, entre as 9.00 e as 11.00 horas, no Servizo de Cultura do Concello de Lugo, situado na Praza Maior, 1, onde tamén se efectuará o selado dos soportes.

A temática das obras xirará arredor da cidade de Lugo, que será retratada desde diferentes perspectivas e estilos. Cada participante executará a súa creación ao aire libre, directamente diante do espazo elixido, convertendo a cidade nun auténtico museo vivo durante toda a xornada.

O certame está dotado con 5.100 euros en premios, cos que o Concello busca recoñecer a calidade artística das obras presentadas e seguir fomentando a creación plástica e a participación neste concurso, convertido xa nun referente dentro da programación cultural do verán.