O Concello de Lugo desenvolverá nos próximos días unha programación especial con motivo do Día Internacional do Orgullo LGTBIQA+, que se celebra cada 28 de xuño para reivindicar a igualdade, a diversidade e o respecto aos dereitos das persoas LGTBIQA+.
Entre as actividades previstas destaca a mesa redonda organizada en colaboración coa asociación Arelas, entidade galega de familias de menores e mocidade trans.
Baixo o título “Romper o illamento: espazos seguros e redes para a mocidade trans”, o encontro celebrarase o martes 30 de xuño no Vello Cárcere. A actividade estará moderada por Cristina Palacios Castro, xerente e traballadora social de Arelas, e contará coa participación de expertos e de persoas con experiencia directa nesta realidade, que compartirán reflexións e vivencias sobre os retos que afronta a mocidade trans e a importancia de contar con contornas seguras e redes de apoio.
A programación inclúe tamén actividades culturais e de lecer abertas á cidadanía baixo o lema “Lugo Diverso: unha festa para todas as cores”, co obxectivo de promover unha sociedade máis inclusiva, respectuosa e aberta á diversidade.
Programación
Venres, 26 de xuño
19.00 horas | Concerto de música en directo no templete da Praza Maior.
Sábado, 27 de xuño
22.30 horas | Lugo Diverso: unha festa para todas as cores, na Praza Bispo Basulto.
Sesión DJ ata a 1.30 horas.
Actividade de facepainting.
Martes, 30 de xuño
19.30 horas: Mesa redonda “Romper o illamento: espazos seguros e redes para a mocidade trans”, a cargo da asociación Arelas, no Vello Cárcere.
