Unha avaría causada polas obras que está a levar a cabo Xestur no polígono industrial das Gándaras de Lugo provocou un corte na subministración de auga da Rede Municipal.
A pesar de que a zona onde está o Hospital Lucus Augusti (HULA) é unha das afectadas, o complexo sanitario funciona con normalidade, xa que conta con dous depósitos que lle permiten manter a subministración normal de auga durante tres días.
Debido á avaría, o Concello cortou o servizo desde esta mañá ás zonas afectadas, que son a parte superior do barrio das Gándaras, Cima de Vila, A Campiña, A Fervedoira e Muxa.
A PREVISIÓN É RESTABLECER ESTA TARDE
Debido á “complexidade” da avaría, a Brigada de Augas anunciou nun primeiro momento que non se podía determinar o fin do corte, pero a última hora da mañá anunciou que ao longo da xornada de hoxe recuperarase o servizo en toda a zona e que as previsións apuntan á primeira hora da tarde.
Desde o Concello pediron desculpas á cidadanía afectada “polas molestias que lles ocasione este corte de auga, que non se produciu pola actividade de ningún servizo municipal, e que se está tentando resolver canto antes”.
