A alcaldesa de Lugo, Paula Alvarellos, xunto co resto de edís do seu goberno, visitou este martes a pasarela de acceso ao río Miño no seu día de apertura ao público. Así, a rexedora sinalou que “a pesar das continuas esixencias” da Xunta, Lugo está máis preto de ter “unha zona de baño estable”.

Nunha nota de prensa, o goberno local esgrimiu que a consecución deste acceso sitúaos “máis preto” do seu obxectivo final, aínda que matizou que esta “non é a zona de baño que queren” pero é “a mellor á que lles deixaron optar”.

Así mesmo, a rexedora subliñou que o seu goberno logrou “evidenciar” ante os veciños o “boicot” do que, aseguran, que “todos os lucenses son vítimas”.

Neste sentido, lembrou que os trámites para colocar a infraestrutura na beira do Miño “alongáronse durante todo o verán”. De feito, Alvarellos asegurou que o seu goberno “solicitou o permiso para instalar esta rampla provisional antes do verán” co obxectivo de que a cidadanía “puidese acceder ao río de forma segura” durante o período estival.

Deste xeito, esgrimiu que “non puideron abrila” ao públcio ata agora polas “continuas trabas e esixencias” do Executivo galego. “É obvio que seguimos sendo reféns políticos e que o obxectivo segue sendo privar aos lucenses de gozar do río como fan con outros concellos”, subliñou.

Respecto á montaxe desta rampla, Alvarellos fixo fincapé en que “máis aló dos traballos de prospección a instalación desta infraestrutura non supuxo custo adicional para as arcas municipais”, porque indicou que a pasarela se fixo con material do que “xa dispuñan e con medios propios”.