A Deputación de Lugo aprobou este venres un investimento de 373.028,38 euros para a mellora de dúas estradas provinciais ao seu paso polos municipios de Palas de Rei e A Pastoriza. Así o anunciou a portavoz socialista, Pilar García Porto, tras a reunión semanal da xunta de goberno.
Por unha banda, a institución provincial licitou un proxecto para acondicionar varios tramos da estrada LU-P-4004, en Palas de Rei, cun orzamento de máis de 324.623 euros. Esta vía, que atravesa os núcleos de Devesa de Rei, Ribeira e Xende, ten especial relevancia para o municipio ao dar servizo a explotacións gandeiras, unha casa de turismo rural e varios templos relixiosos.
As actuacións previstas inclúen a limpeza e reapertura de cunetas, a pavimentación do firme e a renovación da sinalización. Os traballos desenvolveranse en tres tramos concretos da estrada: entre os puntos quilométricos 1,3 e 3,1; do 3,7 ao 5,5; e do 9,8 ao 10,2, cun prazo de execución estimado de catro meses.
O PSdeG de Palas de Rei valorou positivamente esta actuación, que consideran froito das xestións realizadas desde o grupo municipal socialista. A portavoz, Ana Corredoira, subliñou que se trata dunha demanda histórica dos veciños e lembrou que mesmo se impulsou unha recollida de firmas para reclamar o seu arranxo. “Celebramos que nos próximos meses por fin aténdase esta necesidade da nosa veciñanza, que se mobilizou para pedir unha actuación urxente”, afirmou.
Corredoira destacou ademais o compromiso da Deputación coas necesidades do rural e sinalou que “desde a oposición tamén se pode facer política útil cando hai compromiso coa cidadanía e vontade de defender as súas demandas onde corresponde”.
Por outra banda, a xunta de goberno adxudicou por 48.405,20 euros as obras de mellora dun tramo da LU-P-3006, a estrada que conecta Meira coa Pastoriza a través de Fonmiñá. Os traballos, que executará a empresa CHOLO S.L., centraranse nun tramo de algo máis de 800 metros, entre os puntos quilométricos 1,120 e 1,935.
Esta vía resulta clave para a mobilidade dos veciños de ambos os municipios, xa que conecta o núcleo da Pena, en Meira, coa LU-122, ademais de dar acceso a explotacións gandeiras, ao polígono industrial de Meira –onde se sitúan diversos negocios e establecementos hostaleiros– e ao centro de saúde.
As obras contemplan a limpeza de cunetas, a pavimentación con aglomerado en quente e o repintado da sinalización horizontal con marcas reflectoras. O prazo de execución previsto é dun mes e medio desde o inicio dos traballos.
Na mesma sesión, a Deputación tamén deu luz verde á convocatoria e ás bases específicas para a creación de dúas listas de emprego: unha de técnico auxiliar de protocolo e outra de axudante mecánico. As persoas interesadas poderán consultar toda a información no Boletín Oficial da Provincia nas próximas semanas.
