Era sabido, Yoe33 ía facer historia unha vez máis, e non defraudou. Un dos pioneiros do graffiti lucense, con máis de 30 anos de traxectoria artística, encárgase estas semanas de elaborar un mural destinado, dende antes de ser iniciado, a converterse nun novo emblema da cidade. Agora, antes de ser rematado, xa conta con varias páxinas de aventuras.
Antes de ser finalizada, esta semana a galaica da Ronda da Muralla foi branco de varias críticas nas redes sociais, algunhas delas de moita intensidade, e o resultado foi que o seu autor, Manuel Pallín (Yoe 33) decidise dar un xiro no guión. Un xiro sentido por moitos lugueses -que admiraban o proceso creativo previo- que agora están dobremente volcados cun artista querido, respectado, admirado, que respondeu á situación coa altura que xa se lle coñece.
Unha cara tapada, uns novos trazos, posteriormente incluso un “Mural en proceso” en medio da parede acompañado dun corazón… e a Muralla Romana, con numerosos espectadores e “hinchas” de Manu utilizándoa de balcón e de tribuna para mandarlle forzas e azos, vivindo un novo capítulo nos seus máis de 1700 anos de historia.
