A Policía Nacional detivo a catro novos máis en relación coa pelexa multitudinaria que se produciu na rúa Catedral, en Lugo, na madrugada do 22 ao 23 de xaneiro.
Estas detencións a catro homes –-todos contan con antecedentes e teñen entre 24 e 26 anos— producíronse a última hora do 28 de xaneiro, o que se suma á detención que xa se produciu durante a noite do incidente dun mozo por causar a outro feridas con arma branca.
Así, a Policía dá por terminada a operación cun total de cinco detencións. Aos últimos catro apresados acúsaselles de tentativa de homicidio, lesións graves, roubo con violencia e ameazas.
Segundo o relato policial, esa madrugada producíronse tres episodios violentos, o principal tivo lugar preto das 4,00 horas da madrugada, cando tres dos agora detidos atopáronse na rúa Catredral cuns coñecidos, os cales os denunciaron no pasado por un roubo –declarados culpables os acusados no xuízo–. Ao velos, recrimínanllo e comeza unha agresión ao grupo de amigos que transitaban por esa zona, entre os cales había quen nada tiñan que ver co xuízo citado.
Este é o enfrontamento que se puido ver por redes sociais, ao cal acudiu a policía. Producíronse dous feridos graves, un inconsciente e outro cun nocello fracturado.
Previamente, á 3,00 da madrugada do domingo, 23 de xaneiro, tres dos agora detidos xa protagonizaran unha primeira agresión a outros dos novos –un deles é quen despois acoitelaría a un deses agresores, polo que foi detido esa mesma madrugada–.
Así, chégase ata o terceiro episodio violento. Un dos participantes na agresión das 3,00 horas, pero que se marcha da da pelexa das 4,00 horas, atópase na súa fuxida cos primeiros agredidos na contorna da Praciña da Universidade, onde sofre un acoitelamento. A Policía detivo nese momento ao presunto autor.
Así, a Policía sinala que “se puido esclarecer” os feitos tras días de “intensa” investigación, con toma de declaracións, visionado de gravacións e colaboración entre axentes da Nacional e a Local. Tres dos detidos o venres pasarán a disposición xudicial en próximas horas, mentres o cuarto quedou en liberdade tras prestar declaración.
