Os dous concelleiros con que conta Ciudadanos (Cs) no Concello de Lugo, a portavoz, Olga Louzao, e Juan Vidal Pardo, permanecen confinados nos seus domicilios “sen síntomas”, tras dar positivo por covid-19 esta fin de semana.
A portavoz da formación laranxa confesou que se atopa “ben”, encerrada na súa casa xunto ao seu fillo de pouca idade que tamén deu positivo e o seu marido, que igualmente se contaxiou, aínda que pasa o confinamento en casa dos seus pais. De todos os xeitos, advertiu que nota “un cansazo un pouco maior do normal”. “Se non fóra por ese cansazo, todo normal”, describiu a concelleira lucense.
Ademais, o seu compañeiro, Juan Vidal Pardo, sinalou que se atopa na mesma situación que ela e que ambos están “a traballar de forma telemática” porque esta semana ten previstos dous plenos, o de orzamentos e o do estado da cidade.
En canto ao pleno de orzamentos, avanzou que votarán en contra, do mesmo xeito que o dez concelleiros do Partido Popular (PP). Finalmente, sairán adiante estas contas que superan os 106 millóns de euros, cos votos do goberno que integran socialistas, con oito concelleiros, e o BNG, con cinco.
“Despois de analizar as contas mal e a rastro, porque non tivemos acceso ás mesmas ata despois de que o coñecesen os medios de comunicación na presentación que fixo (a alcaldesa) Lara Méndez, non puidemos presentar emendas e tampouco se nos deu resposta ás dúbidas polo que decidimos votar en contra”, confirmou.
Louzao lamentou que sexan unhas “contas que non responden á realidade actual que vivimos, só se invisten 350 mil euros máis en relación a este ano e estamos nunha situación económica complicada e estas partidas tiñan que ser o apoio aos veciños e non é así”.
Estes positivos, xunto á da concelleira de Cultura, a nacionalista Maite Ferreiro, obrigaron ao Concello de Lugo a retomar as sesións plenarias, de orzamentos e o estado da cidade, de forma telemática ao longo desta semana.
