O Concello de Lugo colabora coa RTVE no lanzamento da ‘La gran consulta’, unha campaña transmedia de participación cidadá para coñecer cal é a radiotelevisión pública que quere a xente e a función que os cidadáns esperan dela. Unha campaña que vai ser, non só analóxica e na rúa, senón tamén dixital, para chegar á cidadanía de todas as idades e que abarcará medios dixitais, RRSS e as pantallas de RTVE.
É a primeira vez en España que se pregunta á poboación sobre o papel que debe xogar un medio de comunicación público. Iniciativas parecidas fixéronse antes en países como Francia, Gran Bretaña ou Luxemburgo.
A alcaldesa de Lugo, Lara Méndez, anima á veciñanza a participar nesta campaña “pola importancia que ten que se leve a cabo unha programación televisiva de calidade que pagamos con fondos públicos e que debe ser independente, rigorosa, diversa, respectuosa e que actúe realmente como un servizo público”.
Esta consulta concluirá coa redacción dun Libro Branco sobre RTVE que recollerá as conclusións da enquisa e servirá de base para a elaboración do novo mandato marco sobre o que pivotará a radiotelevisión pública. En redes sociais usarase o hashtag #LaGranConsulta e a enquisa está dispoñible en https://lagranconsulta.rtve.é/ O Concello de Lugo cederá diferentes soportes mediáticos municipais para impulsar a campaña.
