Axentes da Policía Local de Lugo disolveron na tarde do luns unha festa no parque de Albeiros, na que instalaran unha carpa portátil e sen autorización, segundo informa o consistorio no parte de incidencias.

Os feitos producíronse ás 20,15 horas do luns e, tras comprobar que se trataba da celebración duns aniversarios, para o que se instalou unha carpa portátil, procedeuse á identificación do organizador da mesma. Os axentes requiríronlle para retirar a carpa e proceder á limpeza da zona.

Por outra banda, ás 00,19 horas, a Policía trasladouse a un establecemento da rúa Luís Seoane xa que, segundo a súa camareira, no interior atopábase un cliente en estado ebrio molestando ao resto de clientela. O home, tras o requirimento dos axentes, abandonou o local.

Así mesmo, a Policía interveu por queixas por ruídos nun piso da rúa Escultor Asorey. Tamén denunciou a un condutor por dar positivo na proba de alcoholemia e a unha muller por ter un can, cruzamento de razas, sen a documentación preceptiva.