Axentes da Policía Local de Lugo, que acompañaban a unha comisión xudicial para executar unha orde de desafiuzamento nunha vivenda da Rolda da Muralla, detiveron a un home de 33 anos de idade polos delitos de desobediencia, resistencia e atentado á autoridade, dado que se puxo violento e un dos policías resultou ferido e terá que ser intervido cirurxicamente por mor desa agresión.
Sucedeu sobre as 10:15 horas deste xoves -30 de xuño-, cando axentes da Unidade Territorial de Policía de Barrio falaron co home que estaba dentro da vivenda para informalo de que tiña que recoller as súas pertenzas e abandonar o lugar, en cumprimento da orde xudicial.
Con todo, o home negouse e, aínda que nun primeiro momento mostrou unha resistencia pasiva, acabou por reaccionar con violencia contra os axentes, aos que lles propinou varios empuxóns e patadas para tentar botalos da habitación na que estaba.
Como mostraba unha “actitude moi violenta e agresiva”, os axentes procederon ao seu inmobilización, detención e posterior traslado ás dependencias policiais, onde se instrúen dilixencias para o Xulgado de Garda. Por mor desta intervención, un dos policías sufriu unha lesión nun brazo, polo que tivo que ser trasladado a un centro médico. Terá que ser intervido cirurxicamente no día de hoxe.
