Axentes do Corpo Nacional de Policía detiveron aos tres mozos, todos de vinte anos de idade, que participaron nunha violenta pelexa que se produciu o pasado fin de semana na Rúa Nova, no centro histórico da cidade de Lugo, e que acabou cun rapaz ferido de gravidade, tras ser agredido canto estaba no chan.

Segundo informou a Comisaría Provincial de Lugo, un enfrontamento entre dous grupos de mozos acabou cunha violenta agresión a un deles, que tivo que ser atendido polos servizos de emerxencias e recibir 17 grapas de sutura por mor dunha ferida, ao que ademais lle roubaron algunha das súas pertenzas.

A pelexa comezou por mor dunha discusión entre dous grupos de mozos que estaban a celebrar a gradación, no momento no que un deles losqueou a outro. O ferido de maior gravidade tratou de porse no medio de ambos para evitar que a situación fose a máis, pero nese momento apareceu un dos detidos, quen golpeou ao outro rapaz cunha botella que levaba na man en varias ocasións.

A vítima tivo que ser trasladado de urxencia ao HULA para recibir atención médica. Unha vez presentada a correspondente denuncia, e despois de que as testemuñas prestasen declaración, dous mozos foron detidos por lesións leves e o que agrediu á vítima cunha botella por lesións de gravidade. Todos quedaron en liberdade, á espera de xuízo.