Unha patrulla da Policía Local de Lugo multou con 1.500 euros o titular dun vehículo dunha autoescola da provincia no que circulaban unha profesora e tres alumnos sen constar o seguro obrigatorio dende o mes de setembro.
Os axentes deron o alto ao vehículo na rúa Paseo dos Estudantes, na zona sur da cidade. Comprobada a súa documentación, viron que á parte de carecer de seguro, na base de datos policial figuraba a anotación de dous embargos.
Así, amais da sanción económica, a Policía abriu un expediente sancionador contra o titular do vehículo e procedeuse á súa retirada ao depósito municipal, onde permanecerá ata que se regularice a súa situación.
PATINETES ELÉCTRICOS
Por outra banda, a Policía Local de Lugo tamén cursou denuncias a dúas persoas que circulaban no mesmo patinete eléctrico en sentido contrario pola avenida de Ramón Ferreiro. Conducían o patín facendo zig-zags, nunha “clara condución neglixente”. Por tal motivo, o condutor enfróntase a unha multa de 300 euros.
