A Fiscalía rebaixou de 26 anos de cárcere a 3 anos e medio de prisión a petición para o propietario do club de alterne Eros ao que acusa de fomentar a prostitución coactiva, atentar con dereitos dos traballadores, facilitar a inmigración ilegal e posuír armas de forma ilícita.

A petición da Fiscalía foi reducida tras unha acordo de conformidade coa defensa do único acusado, M. G.A., na vista oral do xuízo dunha das pezas da denominada Operación Carioca, cuxo inicio se celebrou este mércores. M.G.A, que xa estivo máis dun ano en prisión preventiva, recoñeceu os feitos.

De feito, o seu avogado, José López, solicitou a suspensión da condena aludindo a eses meses que xa estivo no cárcere o seu cliente. “Cremos que xa foi suficiente a pena sufrida durante a instrución da causa”, asegurou.

O compromiso alcanzado na audiencia de Lugo tivo tamén en conta a atenuante de dilacións indebidas -os feitos remóntanse ao período entre o 2006 e 2009- xa que o proceso xudicial estivo paralizado por “causas non imputables” a M. G.A., segundo o acordo.

O propietario do club de alterne terá que pagar tamén 4.000 euros de multa e indemnizar con 6.000 euros ás mulleres ás que obrigou a exercer a prostitución no seu establecemento.