Axentes da Policía Local de Lugo cacharon ao volante dun coche a un rapaz de 19 anos que nunca sacara o carné de conducir. O xove circulaba canda o seu pai, que ocupaba o asento de copiloto. Por esta infracción, o corpo municipal intruíu dilixencias por un delito contra a seguridade viaria.
Segundo relata GaliciaConfidencial, os funcionarios da orde pública decatáronse de que, na tarde deste martes, un turismo circulaba polo Paseo dos Estudantes de Lugo a un ritmo anormalmente lento. Asemade, o condutor amosaba dificultades para controlar o vehículo.
En consecuencia, os policías esixiron o alto e puideron constatar que o rapaz endexamais obtera o permiso de conducción. A continuación, o pai do condutor tivo que facerse cargo do coche.
A Policía Local instruíu dilixencias ao Xulgado de Garda baixo a modalidade de xuízo rápido, valorando a presunta autoría dun delito contra a seguridade viaria. O pai e maila titular do turismo son investigados en calidade de cooperadores necesarios para o mesmo delito.
