EFE | A xunta de goberno do Concello de Lugo aprobou hoxe a adxudicación das obras para peonalizar a rúa Quiroga Ballesteros, unha das principais vías do centro histórico da cidade e onde están situados tanto o mercado municipal como a praza de abastos.
As obras para peonalizar Quiroga Ballesteros foron adxudicadas finalmente por 732.000 euros e a empresa concesionaria terá un prazo de execución de 10 meses. O proxecto foi adxudicado á empresa Ovisa Pavimentos e Obras, que se ocupará tamén da renovación do saneamento e a colocación do mobiliario urbano, aínda que quedou de momento descartada a cuberta da rúa cuxa colocación foi proposta “no pasado”.
O tenente de alcalde, Rubén Arroxo, lembrou en declaracións aos medios de comunicación que se “trata dun proxecto importante” dentro do “novo modelo de cidade no que está a traballar a área de Mobilidade”, que aspira “a transformar a mobilidade” de Lugo neste 2020, coa peonalización de varias zonas do centro urbano, entre elas parte da Rolda da Muralla.
“Lugo está a adiantarse ás medidas que a Dirección Xeral de Tráfico aprobará” para conseguir “cidades con menos tráfico e máis ordenado”. Nese sentido, asegurou que a súa área de goberno seguirá “traballando para gañar espazos para os peóns” e para aplicar medidas que consigan “acougar o tráfico”.
