EFE | A Xunta de Galicia informou de que reiniciou as obras de rehabilitación e reforma do antigo Hospital Materno Infantil de Lugo, dentro do complexo do Xeral —no barrio da Residencia—, para habilitar nese edificio o primeiro Centro Integral de Saúde que funcionará na comunidade autónoma.
As obras retomáronse “unha vez transcorrido o período de suspensión das actividades non esenciais”, segundo explicou o delegado territorial da Xunta en Lugo, José Manuel Balseiro. Os traballos comezaran “apenas un mes antes da suspensión”, polo que “aínda están na primeira fase”, que consiste na “demolición das estruturas interiores” do edificio para a creación de novos espazos, adaptados ás necesidades do Centro Integral de Saúde.
“Desde o pasado martes, os operarios continúan cos labores de derriba de tabiques e retirada de entullos e outro material, aínda que se extremaron as medidas de precaución, como o uso de máscaras e o respecto das distancias de seguridade.
O proxecto conta cun orzamento de 12 millóns de euros e o prazo de execución previsto é de 20 meses.
