O CEIP Paradai organizará este venres 6 de marzo unha xornada pensada para rachar cos estereotipos de xénero. Co Día Internacional da Muller ás portas, as alumnas e alumnos coñecerán mulleres referentes en distintos ámbitos profesionais para “visibilizar o potencial que temos cada un de nós sen importar o sexo”.

Así pois, visitarán o colexio a atleta paralímpica Adi Iglesias, a actriz Benedicta Sánchez, a educadora social e activista xitana Irene Cortiñas, a policía Silvia Ribeira, a árbitra de fútbol Tania Fente, a arqueóloga Yolanda Álvarez, a mecánica Mercedes Álvarez, a subdelegada do Goberno, Isabel Rodríguez e a conselleira de Educación, Carmen Pomar. 

Será o terceiro ano que se leve a cabo a actividade ‘Rompendo estereotipos’ no CEIP Paradai. Noutras ocasións xa os visitaron enfermeiros, políticas, xogadoras de rugbi, axentes forestais, bailaríns, arquitectas ou policías.