O goberno da Deputación de Lugo informou de que está á espera do correspondente informe pericial sobre os danos que sufriu o catamarán afundido no río Miño durante o pasado temporal. A decisión respecto do futuro da embarcación dependerá da valoración do perito.
O catamarán Pelegrín I, afundido durante a noite do 19 ao 20 de decembro á altura da ponte das Saamasas, xa foi reflotado e trasladado ao recinto que a Deputación Provincial ten no municipio de Begonte. Alí permanecerá ata que dito informe técnico determine o alcance real dos danos sufridos e o custo dunha hipotética reparación que conclúa se paga a pena reparalo ou, pola contra, se se opta por envialo a despezar.
CRÍTICAS DO PP
Namentres, o Partido Popular queixouse de que a embarcación leva xa “varios días deteriorándose” aínda máis “ao aire libre” , xa que “non cabe” no interior das naves que a Deputación ten en Begonte. Ao seu xuízo, “o caso do barco afundido en Lugo é unha clara mostra de como o goberno bipartito entende a xestión do diñeiro público”. EFE
