O colectivo ADEGA continúa coa posta en valor do medio natural e organiza un roteiro pola contorna do río Tórdea, en Castroverde. O itinerario discorrerá polas parroquias de Furís e San Miguel de Páramo, de xeito que os asistentes desfrutarán de carballeiras e soutos con árbores centenarias, igrexas, xacementos arqueolóxicos ou mesmo dun treito da Vía Romana XIX.

ADEGA organiza este percorrido da man da asociación Amigos do Patrimonio de Castroverde, no marco do programa ‘Tecendo redes’. A ruta, cunha lonxitude de 17 quilómetros e un desnivel de 300 metros, ten unha duración aproximada dunhas catro horas e media. Comezará na igrexa de Santo Estevo de Furís, dende onde se botará a andar por camiños rurais sen asfaltar que conducen ata puntos de grande interese ambiental, como a carballeira de Furís ou os afluentes do río Tórdea.

A pé do camiño, tamén se atoparán bens patrimoniais cun importante valor histórico: xacementos arqueolóxicos (como o castro de Arrubial), igrexas, capelas, cruceiros, construcións etnográficas (muíños e fontes) ou a Vía Romana XIX.

As persoas interesadas deben reservar a praza antes do xoves 16 de xaneiro ás 14:00 horas, no teléfono 982 24 02 99 ou a través desta web.