A sala terceira do Tribunal Supremo desestima o recurso do Concello de Lugo contra a sentenza que anulaba parcialmente a Ordenanza de Uso do Galego na administración municipal. Confirma así o ditame do Tribunal Superior de Xustiza de Galicia do 18 de febreiro de 2016, que estimaba parte da reclamación de Galicia Bilingüe.
O Supremo avala así a resolución da xustiza galega, que anulaba os elementos contrarios a dereito na norma municipal de Uso do Galego. Concretamente, a sentenza deixaba sen efecto os artigos 7, 10 e 15, obrigando a suprimir certos parágrafos e termos dos artigos 1, 3, 4, 5, 8, 9, 12, 18, 24 e 26.
O tribunal considera que o recurso presentado polo Concello carece de rigor e fundamentación cando remite á falta de claridade da sentenza, observando que o fallo do TSXG está en todo momento motivado.
Sobre os artigos obxecto da desputa legal, o Supremo indica que a administración local adolece de definición e “crea un estado de inseguridade” sobre a posibilidade de empregar o castelán para dirixirse ao consistorio; que a ordenanza “non é proporcional nin razoable”, que “colisiona co dereito a empregar o castelán”, e que “en modo algún se xustifica polo fomento do galego”.
