EFE – Redacción | O secretario xeral da Confederación de Empresarios de Lugo (CEL), Jaime López, asegurou que se abre “un período de reflexión” na patronal galega. As declaracións deste venres prodúcense logo de fracasar a reforma dos estatutos da organización. Malia predicar a necesidade de traballar “dende dentro” para evitar o cisma, o representante do empresariado lucense aclarou que non aceptarán en futuras negociacións “ningún tipo de imposición”.
En canto á posibilidade de que os empresarios de Pontevedra e Ourense estean a plantexarse o seu futuro na Confederación de Empresarios de Galicia (CEG), López lembrou que “xa houbo advertencias no pasado nese sentido”, mais a patronal nunca chegou a romper. En declaracións á axencia Efe, o secretario xeral da CEL insistiu en que calquera asunto que afecte á organización galega debe resolverse “por consenso”.
Así, advertiu de que os empresarios de Lugo non están dispostos a “a admitir ningún tipo de imposición”, e menos “de xeonllos”. “Ábrese un período de reflexión para seguir a traballar nos nosos estatutos”, explicou López. “Toca traballar” e deixar de especular “de se abandonamos ou non abandonamos” a CEG. Ao respecto, concluíu que “hai que traballar dende dentro”.
