Lugo Monumental presentou no rexistro da Xunta de Galicia dúas mil sinaturas en oposición ao traslado da estación de buses. A patronal do casco histórico, que puxo información e recolleu os apoios a iniciativa da propia veciñanza, defende que o propio goberno galego conclúe que a ubicación actual favorece o modelo de mobilidade da cidade.
As sinaturas corresponden a 1.575 en papel e outras 511 na plataforma dixital change.org. Dende Lugo Monumental trasladan que manter e reformar a estación de buses é mellor alternativa que fusionala na futura intermodal. A asociación pide desvincular esta decisión dos traballos para a chegada da Alta Velocidade, por considerar que é un “debate falseado”.
“Vincúlase erroneamente a necesidade da intermodal coa chegada do AVE a Lugo”, explican. O colectivo empresarial traslada que o debate “demóstrase falso” ao comprobar que Madrid, “a cidade con máis liñas de alta velocidade de España”, carece de estación combinada. Opinan en Lugo Monumental que o proxecto da intermodal é un engano, porque “a data dos trens, o que realmente se necesita, aprázase ano tras ano”.
Convidan dende Lugo Monumental a consultar o estudo realizado pola Xunta de Galicia, titular da infraestrutura. “Máis da metade dos usuarios da estación de buses acuden camiñando (54 por cento), mentres que tan só o 16 por cento dos usuarios da de tren o fan deste xeito”. Nese senso, a patronal aposta por evitar “o uso do vehículo particular” e promocionar o transporte público urbano.
“Alonxar as estacións dos cascos históricos é unha política que se está desbotando, porque o modelo de transporte interurbano aposta por minimizar os desprazamentos e procurar alternativas peonís”. Así, amosan o exemplo de Madrid, que completou a interoperabilidade entre estacións con transporte urbano; o de Santiago de Compostela, “que plantexa achegar a intermodal ao núcleo urbano”; ou o de Vigo, “que levou o tren o máis preto de Urzáiz que se podía”.
A Xunta rexeita o protocolo da Intermodal de Lugo proposto por Fomento
