As protestas das Gándaras recibiron este luns a primeira resposta institucional. O presidente do Tribunal Superior de Xustiza de Galicia (TSXG), Miguel Anxo Cadenas Sobreira, suxeriu na capital lucense cambios legais para frear máis eficientemente a ocupación ilegal.
Este fenómeno ten especial incidencia en Lugo, cidade onde un de cada cinco inmobles está baleiro como resultado dun programa de urbanismo expansionista iniciado a comezos dos noventa. O episodio máis recente é o das Gándaras, barrio que viviu a ocupación ilegal de catro vivendas, e que se mobilizou para evitar outra acción semellante. Outras zonas afectadas son as da Residencia e A Milagrosa.
O máximo responsable do alto tribunal galego explicou que “a resposta xudicial ten que ser o máis inmediata posible”, mais advertiu de que o prioritario é o respecto ás normas legais. Por iso, “se son insuficientes ou revelou a realidade que hai un problema que a norma non cobre suficientemente, o que hai que facer é cambiar a norma”.
Malia suxerir este cambio lexislativo, Cadenas insistiu sobre a acción xudicial en casos coma o das Gándaras en que “o que non se pode ordenar” sería “un desaloxo sen a cobertura legal”. O proceso debe seguir a canle estipulada, e non cabe actuación “sen unha resolución xudicial firme que ordene o desaloxo, xa sexa en vía penal, xa sexa en vía civil”.
As declaracións do presidente do TSXG foron realizadas durante a constitución da Comisión Provincial de Violencia de Xénero de Lugo, que ten por misión a mellora do sistema de protección das vítimas.
