A Audiencia Provincial de Lugo alberga este luns a constitución da Comisión Provincial de Violencia de Xénero de Lugo. Este organismo, a implantar en todas as provincias do estado, ten por misión a mellora do sistema de protección das vítimas, para o que coordinará ás institucións implicadas, e contribuirá a solucionar os erros detectados na mesa de coordinación.

No ente valoraranse as situacións de risco para as vítimas da violencia de xénero, orientando a actuación das unidades da policía xudicial adscrita e o Instituto de Medicina Legal (Imelga), fundamental na acción penal. A Comisión Provincial estudará as ordes de afastamento e abordará medidas de asistencia letrada ás mulleres dende dependencias policiais.

O acto de constitución da Comisión Provincial de Violencia de Xénero de Lugo celebrarase dende as 10.30 horas. Asistirán o presidente do Tribunal Superior de Xustiza de Galicia, Miguel Anxo Cadenas Sobreira, o presidente da Audiencia Provincial de Lugo, José Antonio Varela Agrelo, e o fiscal xefe da provincia, Roberto Brezmes Caramanzana, entre outras autoridades.