Facua Galicia emitiu un comunicado no que insta ao Sergas a reforzar de xeito inmediato o servizo de pediatría nos municipios lucenses da Fonsagrada, Baleira e Castroverde. A organización reclama “medidas urxentes” para evitar que as familias destes concellos teñan que realizar desprazamentos de ata 60 quilómetros para que os menores reciban atención médica.
A asociación dirixiuse ao Sergas tras ter coñecemento de que estas localidades quedaron sen o servizo de pediatría durante os meses de febreiro e marzo. Segundo denuncia Facua, a alternativa ofrecida pola administración sanitaria consiste en que os pais acudan ao médico de cabeceira ou se despracen directamente á PAC do Sagrado Corazón en Lugo, o que supón unha importante barreira de acceso á saúde para os veciños da montaña lucense.
Neste sentido, a organización lembra que a Lei de saúde de Galicia establece como principios fundamentais a calidade dos servizos, a atención personalizada e a coordinación eficiente dos recursos. Facua insiste en que a situación actual vulnera estes preceptos e esixe unha solución que garanta unha atención “humanizada” e próxima para a poboación infantil destas zonas rurais.
