O PP da provincia de Lugo alertou publicamente dun “forte incremento” da criminalidade, tanto na provincia como no municipio, unha situación que se agrava pola “grave carencia” de medios humanos e materiais nas forzas de seguridade, incluídas a Policía Nacional e a Garda Civil. O deputado no Congreso, Francisco Conde, criticou duramente o Goberno central por estar “máis preocupado por favorecer aos delincuentes que aos cidadáns”.
Segundo os datos detallados por Conde, correspondentes ao período xaneiro-setembro entre 2018 e 2025, a seguridade dos lucenses viuse seriamente comprometida, xa que a criminalidade total aumentou un 34,9% na provincia. O deputado fixo fincapé na alarma que supón o aumento do 62% nos delitos contra a liberdade sexual nese mesmo período. Ademais, subliñou que no último ano o aumento da criminalidade na provincia (3,2%) é un 31,25% superior ao rexistrado no conxunto de Galicia (2%).
Neste contexto, a cibercriminalidade é o fenómeno de maior crecemento, sumando 1.863 infraccións no último ano, o que xa representa o 25,7% do total provincial. Conde mostrouse especialmente preocupado por este incremento de delitos graves e os vinculados a contornas dixitais. A tendencia reflictese na capital, a cidade de Lugo, onde a criminalidade creceu un 32,4% entre 2018 e 2025. As infraccións por cibercriminalidade aumentaron un 24,1% no último ano, e as agresións sexuais con penetración multiplicáronse por catro nun só ano.
Finalmente, o PP concluíu que o Executivo estatal prioriza os seus pactos políticos e a xestión dos seus casos de corrupción, no canto de reforzar a seguridade e proporcionar máis medios aos Corpos de Seguridade do Estado, mentres Lugo padece un aumento da delincuencia moi por riba da media galega.
