Un home foi detido por un suposto delito de atentado contra un axente da autoridade, 39 persoas foron identificadas e varias actas de denuncia por diversas infraccións foron levantadas en varias inspeccións en locais de lecer nocturno levadas a cabo pola Policía Local de Lugo, nunha operación conxunta co Corpo Nacional de Policía.
Os controis realizáronse en dous establecementos que xa estaban baixo seguimento policial por incumprimentos reiterados detectados en meses anteriores. En ambos os casos, os axentes constataron graves irregularidades que afectan directamente á seguridade e salubridade dos espazos destinados ao lecer nocturno.
Entre as principais infraccións detectadas figuran deficiencias graves na limpeza e hixiene dos aseos, a ausencia do cartel informativo sobre o tratamento de imaxes de videovixilancia e a falta de persoal habilitado para o control de accesos. Nun dos locais, ademais, comprobouse que a persoa encargada do devandito control carecía da titulación esixida pola normativa e negou manter relación laboral co establecemento, feito que foi recollido na acta policial. Os axentes subliñan que este posto é clave para garantir a seguridade do local, especialmente no relativo ao control de aforamento e prevención de incidentes.
O operativo pechouse coa interposición de seis actas de denuncia ao amparo da Lei Orgánica 4/2015 de Protección da Seguridade Cidadá, ademais da citada detención. Este tipo de actuacións mantéñense de maneira periódica na cidade, con especial atención a aqueles locais que incumpren de forma reiterada a normativa vixente, unha actuación que a Policía Local asegura que se seguirá realizando.
