A Deputación de Lugo e a Federación Galega de Comercio lanzaron este venres na praza de San Marcos unha campaña para apoiar ás familias lucenses na volta ao colexio e, ao mesmo tempo, reforzar ao pequeno comercio da provincia. A iniciativa contempla o sorteo de 90 bonos de 250 euros cada un, o que supón unha inxección económica de 50.000 euros destinada a incentivar as compras nos negocios locais nun momento especialmente esixente para a economía doméstica.
As persoas interesadas en participar e optar a un destes bonos deberán realizar compras en calquera comercio local da provincia entre o 1 e o 30 de setembro, conservar o ticket e rexistrarse na web www.bonosdeputacionlugo.com. O 2 de outubro celebrarase o sorteo dos bonos, que repartirán un total de 22.500 euros en cartóns regalo canjeables ata o 31 de decembro en establecementos de Lugo.
Ademais, haberá un sorteo especial dun cartón de 2.500 euros que o gañador deberá gastar nunha única xornada e nun só municipio da provincia. Para participar nesta modalidade será necesario asistir ao acto de entrega de premios, que se celebrará o 16 de outubro ás 19:00 horas no salón de actos da Deputación, presentando un ticket de compra nun comercio físico de calquera dos 67 concellos da provincia, emitido entre o 1 de setembro e o propio día do evento.
O presidente da Deputación, José Tomei Roca, explicou que se trata dunha acción “estratéxica”, lembrando que o comercio representa máis do 26% do tecido empresarial de Lugo, con máis de 9.400 establecementos vinculados ao sector e na súa maioría (un 96%) con menos de dez empregados. “O pequeno comercio non só xera emprego e actividade, tamén é un motor de cohesión social, sobre todo nos municipios rurais, onde estas tendas son un servizo básico e un punto de encontro”, sinalou.
Na mesma liña, Tomei subliñou que a volta ás aulas “é un dos momentos máis difíciles do ano para as familias, que en cuestión de días deben afrontar varios gastos inevitables que poden alcanzar varios centos de euros”. Por iso, defendeu que con esta campaña a Deputación “apoia ás persoas e contribúe a aliviar ese esforzo económico”.
Pola súa banda, o presidente da Federación Galega de Comercio, José María Seijas, destacou a importancia de canalizar ese consumo cara ao comercio de proximidade, “que dá vida e riqueza á provincia”. Lembrou que “a volta ao cole é un dos momentos máis gravosos para as familias”, e que este ano a inflación complica aínda máis afrontar os gastos de setembro, e valorou que esta colaboración coa Deputación “axuda a mitigar o seu impacto nas economías familiares”.
