Os socialistas lucenses, a través secretario xeral provincial Álvaro Santos, salientaron o “contido social” do proxecto de Orzamentos Xerais do Estado presentado este luns polo Goberno. Sinalou neste senso o incremento das pensións –do 1,6 por cento, máis o 3 por cento nas mínimas–, para un total de 117.000 lucenses, o aumento do 60 por cento para dependencia, a recuperación do subsidio por desemprego ou a alza do 22 por cento no salario mínimo, así como a redución do 2 por cento no imposto sobre sociedades.
Pola contra, no Partido Popular consideran que as contas “castigan” a Lugo, a provincia galega con menor investimento con 18,86 millóns das empresas públicas e fundacións e 52,36 do sector administrativo do Estado. O congresista Jaime de Olano asegurou que “o xiro social” consiste en “medidas que aprobara o PP no seu Presuposto para 2018”, en partidas para o salario dos funcionarios ou na violencia de xénero.
O tamén deputado popular Joaquín García citou un descenso do 35 por cento no orzamento para infraestruturas viarias, que “abocan á paralización” da A-54, diminúen a contía da A-74 e da A-56.
No Bloque Nacionalista Galego, a parlamentaria Olalla Rodil entende que existe “un agravio” para a provincia, acusando aos representantes socialistas no Congreso dos Deputados de ser “sucursais da política do Estado”. Rodil subliñou que a falta de compromiso co ferrocarril implica “que non vai contar con orzamento para a súa modernización”. No Bloque entenden que a redución do investimento é “insultante” tendo en conta “a precariedade social e laboral, a emigración e o posíbel peche de empresas” en Lugo.
Dende En Marea, Miguel Anxo Fernán Vello criticou a “falta de compromiso coa precaria liña da antiga FEVE […] que non recibe ningún euro a pesar das denuncias de deficiencias”. O deputado no Congreso por Lugo advertiu de que os orzamentos limítanse ao mantemento e non inclúen cambios na liña Ferrol-Ribadeo. Aliás, valorou os cinco millóns de euros para solucionar os problemas da néboa na A-8. “É preciso que o grao de execución sexa íntegro”, expón.
Tren Lugo-Madrid en menos de catro horas para 2020, un prazo realista?
