Un home resultou ferido na tarde deste martes en Lugo, tras ser golpeado, presuntamente, cunha barra de ferro, por parte doutro home que agora é buscado pola Policía Nacional.
A agresión tivo lugar na estrada de Ourense e provocoulle á vítima fracturas nun brazo, unha perna e feridas na cabeza, o que obrigou ao seu ingreso hospitalario.
Foron outros coñecidos, visiblemente alterados polo ocorrido, quen trasladaron inicialmente ao ferido ao hospital Polusa, aínda que posteriormente foi derivado ao HULA.
No primeiro centro médico a Policía Nacional iniciou a recollida de datos sobre o suceso co interrogatorio ás testemuñas, que foron os que lles informaron da descrición do presunto agresor.
Segundo afirmaron a Europa Press fontes da Policía Nacional, esta mañá seguíase buscando ao suposto responsable da agresión.
