O antigo edificio de Aspnais en Lugo pasará a ser un centro de atención integral á saúde mental, que xestionará o colectivo Alume, tal e como avanzou a conselleira de Política Social e Igualdade, Fabiola García, durante a presentación do anteproxecto. O Executivo galega ten previsto para esta nova dotación un investimento de 3,6 millóns de euros, que se destinará á reforma do edificio por completo e a adaptalo ao seu novo servizo.
As previsións que manexa a Consellería é que o edificio poida porse en marcha en 2027. O primeiro paso será a licitación da redacción do proxecto, que se fará no primeiro trimestre deste ano, segundo avanzou Fabiola García. O inmoble sobre o que se actuase sitúase nunha parcela de 9.000 metros cadrados e a edificación conta con tres plantas nas que se combinará un centro de día, un centro residencial, unha área social e diferentes zonas polivalentes de uso común. Terá unha capacidade de 80 prazas concertadas de atención residencial e diúrna. Isto implicará, ademais, o traslado e centralización de todas as actividades actuais da entidade social Alume nun único complexo, que a conselleira cualificou de “referencia en toda Galicia”.
Alume, a través do seu presidente, Manuel Fernández, agradeceu o investimento e a xestión realizada pola Xunta que permitirá “un aumento cuantitativo e cualitativo” dos servizos que presta este colectivo. Fabiola García aproveitou o acto para dar as grazas a Alume por “30 anos de traballo incansable en favor das persoas con problemas de saúde mental, promovendo a súa recuperación e inclusión sociolaboral para mellorar a calidade de vida dos usuarios”.
REACCIÓN MUNICIPAL
Pola súa banda, a portavoz do Goberno local, Ana González Abelleira, mostra a súa satisfacción: “Por que vemos cumprido o noso obxectivo de recuperar como equipamento sociosanitario a antiga sede de Aspnais. Unha necesidade pola que desde o Concello levamos anos pelexando, como así evidencian as numerosas reivindicacións que levamos feito á Xunta por este asunto nos últimos anos”.
Tamén critica que o Concello de Lugo non fose convidado á presentación “nunha demostración, unha máis de moitas, da falta de lealdade institucional que caracteriza a súa forma de gobernar”. Engade que a Xunta debe reformularse a súa forma de proceder “e entender que o mellor camiño para avanzar como sociedade é sumar o traballo de todos os axentes sociais e institucionais e, por tanto, de todas as administracións”.
