Unha patrulla do Grupo Operativo Nocturno da Policía Local de Lugo detivo na noite do sábado a un veciño da cidade de 53 anos por atentado contra a autoridade cando tentaba acceder a unha vivenda.
Segundo explican nun comunicado, a intervención produciuse na rúa Bispo Aguirre, onde os axentes observaron a un home que tentaba introducir unha chave na fechadura do portal dun edificio, sen conseguilo.
Os axentes pregúntanlle a esta persoa se vive nese inmoble, “respondendo con frases evasivas e descualificativos cara aos policías“, negándose ademais a mostrar as chaves que tentaba usar. É entón cando se lle require que se identifique, ao que se nega o home “reiteradamente”, “comezando a porse agresivo, golpeando no peito a un dos axentes“.
Nese momento procédese á súa detención e trasládaselle a dependencias policiais, onde se instrúen dilixencias para o Xulgado de Garda por un delito de atentado a axentes da autoridade.
