Hai media ducia de empresas semellantes no mundo, e ningunha comparable en España. Con base en Lugo, e sedes en Madrid e Miami, Tastelab une a ciencia e os sentidos para desenvolver tecnoloxía de análise sensorial, que permite procesar, cuantificar e analizar informaticamente a cata profesional do produto ou compoñente desexado. Maruxa García, socia fundadora, narrou o seu percorrido na Mesa Talento en Feminino.
Tastelab é unha empresa de alta especialización, do mesmo xeito que Maruxa é unha profesional recoñecida nun eido no que apenas hai “trinta ou corenta persoas” con formación equiparable no Estado. Emancipada aos dezaséis anos, combinou a súa afición pola comida e a habilidade para as matemáticas, estudou Enxeñaría Agroalimentaria e doutorouse en Ciencia e Tecnoloxía dos Alimentos.
Análise sensorial
Na Escola Politécnica Superior de Lugo entrou en contacto co estudo da análise sensorial, e “pedía participar en todas as catas” mentres preparaba a tese doutoral e realizaba diversas estancias. Con vinte e cinco anos, Maruxa incorporábase a Tecnalia, a quinta corporación tecnolóxica máis importante de Europa. E con vinte e oito, estaba á fronte do seu propio equipo mentres remataba a tese no tempo libre.
Chegou entón a primeira experiencia emprendedora, a construción dunha aplicación móbil na que rexistrar e compartir os achados de novos alimentos de quen viaxan polo mundo, para innovar despois nas empresas. Así as cousas, a idea de Tastelab colle forma no programa alimentario da Fundación Juana de Vega, onde resulta gañadora e recibe titorización para crear a empresa.
Transmisión de coñecemento
A Tastelab a compañaron outras tres socias, vencelladas ás asignaturas de análise sensorial no Campus Terra. A propia Universidade mudou en socia, convertendo a Tastelab nunha spin off, e deseguido medraron ata seis os socios. Maruxa recoñece que era posible levar adiante o proxecto en solitario; mais era preciso obter os beneficios dese acompañamento e a seguridade dos asociados para que a empresa medrara rapidamente, o que inclúe contactos en todo o mundo da alimentación (Pescanova, Pepsico) e na industria farmacéutica, que emprega a análise sensorial para evitar o rexeitamento polo sabor dos xaropes.
Dentro do equipo, a única persoa con experiencia na empresa privada era Maruxa. A falta de profesionais cualificados é a principal debilidade de Tastelab, como acontece de cara a innovación e mellorar o apartado tecnolóxico, para o que contan cun grupo inversor. “O talento ralentizou o proceso”, pola dificultade para atopar talento financeiro, administrativo, técnico e comercial.
Protagonismo para a tecnoloxía
A principal aposta de Tastelab levou a trascender a oferta de auditoría e venda para pasar a construír tecnoloxía, con enxeñeiros informáticos, análise de datos e desenvolvemento de intelixencia artificial. Malia que as conclusións dun estudo seguen a depender dun técnico especialista, as posibilidades do machine learning permitirán que sexa a máquina a que traslade as conclusións.
Na actualidade son sete os empregados, e procuran máis xente para facer as prácticas e recibir adestramento para detectar os parámetros do sabor e a textura. Estes especialistas da cata reciben axuda tecnolóxica e colaboran con consumidores en diferentes áreas xeográficos. O catador di por que un produto é exitoso ou non: para iso debe analizar toda a información de análise sensorial, obtida a través do talento propio e a tecnoloxía.
Hai ano e medio que comezou con este proceso de evolución tecnolóxica. “Hai que estar no mundo e non quedar na casa”, di Maruxa, que imparte clases en catro másteres e cada vez gosta máis do proxecto de Tastelab, con base en Augas Férreas. “Hai mercado”, comenta, convencida de que é posible xuntar afición e profesión “se hai vontade de traballo”.
