O Portavoz do Grupo Provincial Popular de Lugo, Antonio Ameijide, tachou este xoves ao presidente da Deputación de “mentireiro compulsivo” e acusouno non só de “ter coñecemento” da venda pública das parcelas urbanizables de Paradai, en 2007, senón tamén de ter que facer fronte agora, presumiblemente, ao pago dunha indemnización ao propietario dos terreos.
Na rolda de prensa convocada este xoves fronte ao Pazo de San Marcos, o portavoz dos populares na provincia saíu ao paso da denuncia formulada o martes polo presidente, José Tomé, acusando ao PP da venda, en 2007, de case 60.000 metros cadrados de chan público urbanizable a un particular mentres gobernaba a institución en funcións Francisco Cacharro (PP) e tres días antes da toma de posesión de Besteiro como novo presidente.
“Estamos a asistir a unha situación dantesca por parte dun presidente da Deputación esgotado”, comezou dicindo Ameijide, que solicitou a José Tomé que “deixe aos mortos tranquilos” –en alusión ao falecido ex presidente Francisco Cacharro– e “ás institucións públicas fose das pelexas políticas do Partido Socialista”.
Ameijide asegurou que os socialistas eran “coñecedores” da venda das parcelas públicas xa que votaron a favor do inicio do procedemento para o desenvolvemento do Plan Paradai no ano 2004, así como da aprobación dos pregos de alleamento de bens, en 2006, e do expediente de adxudicación da primeira venda das parcelas da contorna ese mesmo ano, cando, salientou, “non había ninguén en funcións porque faltaba un ano para a celebración das eleccións”.
“Que no ano 2007 se publique no Boletín Oficial da Provincia a venda dunha edificabilidade en Paradai de forma pública e transparente, déase un prazo de presentación de ofertas e haxa tres licitadores que se presentan á mesma con total publicidade, iso non é ningún pelotazo, iso é cumprir a lei. Podemos afirmar que o 23 de marzo de 2007, sen ninguén en funcións nesta Deputación, adxudicouse de forma unánime, co voto a favor do PSOE, a venda deses terreos”, profundou.
Tamén asegurou Ameijide que a firma da venda das parcelas realizada por Cacharro mentres se atopaba en funcións foi o “acto debido de calquera responsable que estea nunha administración pública cando non hai un procedemento iniciado e xa adxudicado”. “O único que fixo é asinar o final dese procedemento administrativo, pero todo o procedemento e a adxudicación era previo a ese cambio de goberno”.
A DÉBEDA
Ademais de ser coñecedor da venda pública das parcelas de Paradai, José Tomé tamén tiña coñecemento, tras a liquidación de Suplusa –a sociedade urbanística provincial– no ano 2020, da existencia dunha débeda de 2.718.694 euros por parte do comprador dos terreos por un incumprimento dos acordos de compravenda, asegurou Ameijide.
Unha débeda da que “desapareceron 257.000 euros” en 2021, segundo o portavoz provincial dos populares, pola que a Deputación de Lugo debeu personarse nun proceso contencioso administrativo e a cuxa devolución “teñan que facer fronte probablemente todos os lucenses”.
“Despois de 18 anos esperando unha parcela de substitución, é dicir, eses terreos que comprou por 3.700.000 euros nos que podía edificar, despois de 18 anos, nin hai parcela, nin hai terreos, nin puido pór un ladrillo”, sentenciou Ameijide, que achacou ao “caciquismo e ao urbanismo á carta do Partido Socialista durante os últimos anos” a posibilidade de que poida chegar a producirse un novo caso similar ao do Garañón.
